🍎 ياصــاحبي
هذه القصيدة للشاعر الرائع رائد العالي...
يا صاحبي وشفيك قلّي عسى خير
تشكي وانا خابرك رمز الشجاعة
ان كان حاديك الزمن والمقادير
الصبر للرجال يعطي مناعة
اسمع وخذ مني نصيحه وتذكير
ذرب الكلام اللي يفيدك سماعه
صوادف الدنيا ورود ومصادير
وافضل كنوز الوقت كنز القناعة
اللي كتبه الله على عبده يصير
صبراً جميل ودبرة الله مطاعه
مادمت من روس الرجال المشاهير
مايرتخي راسٍ شمخ بارتفاعه
كره تبي تلقى العوض فالمخاسير
تاصل حبال الوصل عقب انقطاعه
العافية تسوى كنوز الدنانير
والرجل دايم نجدته من ذراعه
صكات بقعا لانصنّك طوابير
خلك كما ضلعٍ تقانب سباعه
شامخ شموخاً ماتهزه معاصير
لو هو محاصر بالخطر كل ساعه
صلف الهوا ماشدد طويق والنير
والحر يقدم والرعاعه رعاعه
ساير زمانك وانتبه تعكس السير
وسمح الجناب اللي يراعيك راعه
..
المشاركة الأصلية كتبت بواسطة حمزه
مواقع النشر (المفضلة)