بعض من ذكريات الماضي

[ابن الصحراء]

عيد(ن) يفرق شملنا مانريده
نبغى الليالي كلها مابها اعياد
قلب الشقا عيد الملا مايفيده
الى صار هو ببلاد والزين ببلاد
لو اننا نلبس ثياب ً جديده
ولو قالو العالم لنا عيدكم عاد
القلب شوف صويحبه يوم عيده
لو ماتعيد باقي الناس وش عاد

[ابن الصحراء]

العيد عدى وخلي ماعرف اخباره
بدل علي فرحة الاعياد باحزاني
لاصوت جاني ولالي قام بزياره
مع نشوته في فرح عيده تناساني
مع الجميلات راح ينظم ادواره
سرح يماري بزينه كل فناني
يبي يوزع خبر زينه على الحاره
حتى يقرن له خدرات الاعياني
اخذ عليهن تاج الزين وشعاره
ونصب على البيض يوم العيد سلطاني

[ابن الصحراء]

خاطره
ثمان وثمانين عيدك يعود
ياوطن دام عزك بطول السنين
انته اشرف وطن ياوطن بالوجود
مهبط الوحي ياقبلة المسلمين
وشرف الله لخدمتك حكم السعود
بحاضر الوقت مع سكة الاولين

[ابن الصحراء]

شفت برق السحـــابــه ونـتـظرنا مطرها
قلـت لعــل تسـقـي لي ضـوامـي حـــلالي
وهب عاصوف من صوب الشمال وحدرها
مــن يـحـاسب هـبـوبن حــد عــنا لخيالي
عـكــر الـجــووالخــطـه عــليـنا دمــرها
ليه كـسر الخــواطـر ياهـبـوب الشمالي

[ابن الصحراء]

سكة المشوار
ستين من سكة المشوار طفناها
ولاباقي الا قليل وناصل المادي
ونسكن بداراً جديده مابـنـيـنـاها
بنيت لمجهول وفيها صار مرقادي
يالله عـفـوك يـاربـي لا نـزلـناها
وصحابنا مددونا وسط اللحادي
رجوى لرحمتك ياربي وحسناها
تغـفر ذنـوبا كثـيره ماله عــدادي
والهمني اسما لثلاثه لو نسيناها
اسمك ودينك وسم مبعوثك الهادي

[ابن الصحراء]

قالو قبض الجيش الليبي على ضباط قطريين بملابس نساء
يحاولو الهروب لانهم كانو يعملو مع المليشيات ضد الجيش الليبي

فجأءت خاطره
ياتميم البس عساكرك ملبوس النساء
وترك الميدان والمعركة لابطالها
لاتقلد من يدوس الصعيبات تخساء
المواقف يابن موزه تعرف رجالها
انت شبهت النشاماءعلى رحل المساء
دائما تدمير الامجاد من جهالها

[ابن الصحراء]

هل يقدر بشار واعوانه منع ضم الجولان لااسرائيل
بشار لايوخذ الجولان
افزع وصوت لنصر الله
طبو مع تراب بالميدان
لايصير بقلوبكم ذله
ماهو مهايط وهرج لسان
وارهابكم بالوطن كله

[ابن الصحراء]

يالاستراحه وين بعض الجماعه
ماهو بعضهم كلهم خلو الدار
أول بهم نورك يشعشع شعاعه
ومعهم تجينا اخبار ونودي اخبار
وان كان دم اخضر ركزبك شراعه
زاد الحماس وثار بركان الافكار
واليوم مابك للوناسه طماعه
جوك يوحش مظلم ً مابه انوار
الله على وقتا مضى وجتماعه
يوم الجماعه دوم بالدار حضار
يوم انها مابين ساعه وساعه
نقراء مواضيعا مثل قطف الازهار
واليوم امني خاطري با لقناعه
ان الزمن لو طول الوقت دوار

[ابن الصحراء]

شوفو نصر الله يهل ادموع
فقد زميله سليماني
مماحصل بالحدث مفجوع
وبقي على الدرب وحداني
عساه قبل يتم اسبوع
لتراب يصبح هدف ثاني

[ابن الصحراء]

في عام 2020
عشرين عشرين جعله عام خير وسرور = يجلا هموم العروبه من ربيعاتها
اعوام قالو ربيع وهي دمار وشرور = واكثر خراب العرب من فعل قاداتها

[ابن الصحراء]

الشعر بالمجهول ماعرف اقوله
ولاله حلا بلا تخيل حلايا
يزين في شخص تخيلت زوله
وقمة حلاته لاعرفت النوايا
الى صار يعرفني وانا اعرف ميوله
ويبوح لي وابوح له بالخفايا
هذي حلات الشعر وهذا أصوله
وبدعه بغير الي ذكرنا خطايا

[ابن الصحراء]

الله من بيت عزيزاً هجرناه
من عقب ماكنا دواما نروده
مع الزمن حتى مكانه نسيناه
ماعاد نذكر باي الاحيا وجوده
من يوم راع البيت قفت مطاياه
النفس عن قربه تقول محدوده
الله يرحم كل عودا فقدناه
والله ينور مرقده في لحوده
وعسى حسناته تغطي خطاياه
وعسى ملايكة الرضا من شهوده

[ابن الصحراء]

العيد قرب وبعض الربع غيابي
وشلون بالعيد مانقدر نعايدهم
العيد يحلو في حضرات الاصحابي
ونصف انسجامه يضيع ان صرت فاقدهم
عسى السعاده تعايد كل الاحبابي
واشوف في مقبل ايامي تواجدهم

[ابن الصحراء]

سالفة وقصيده الولد ون طاب طيبه من خواله------- راشد بن خر الذيب
يقولون ان الشاعر راشد بن حسن الجمعه العجمي الملقب ( بالذيب )
كان يشتغل سوّاق في ارامكو وكانت انظمة ارامكو تمنع السائقين ان يشيلو الطرقيه اللي يوقفون السواقين ويطلبونهم توصيلهم على طريقهم ..
والشاعر راشد الله يرحمه كان يخالف التعليمات وكل هذا حيا فيه ومرجله
يوم من الايام أشرت له عجوز ومعها **** (اعزكم الله)
قالت وصلني يا الأجودي قدام شوي
قال ابشيلك بس ال**** .لا
قالت له خلاص روح الله يستر عليك بيجي الذيب ويشيلني
(( تقصده لانها تسمع انه يشيل اي واحد يجي بطريقه وهي لاتعرفه))
قال لها يا خاله انا راشد الذيب
.. اركبي وابشري بالخير ..
وقيل انه توفي عام 1986م
وهو في نجران وكان شايل معه شخص موصله الى قرية في نجران
وحصل عليهم حادث رحمه الله
واليكم قصيدته المشهوره ردا على من انتقدوه
وكان السائد انذاك أن يأخذ صاحب السيارة على الشخص اذا كان بمفرده ريال واحد أما اذا كان معه ***** فيأخذ عليه ثلاثة ريالات وكان يرفض اخذ مقابل فعل الخير
حالفٍ ماخذ على الطرقي رياله
وبالثلاث محرم أنه مايجيني
لالقيت اللي على الرستة لحاله
يلتفت ويقول وين المستحيني
أوقف الموتر حيا وأبي الجماله
يوم ولد اللاش وجهه ما يليني
الطمع في كروة الرجلي رزالة
خص وان جابه مجال الغانميني
والردي في حالة ماهي بحاله
واعوينه من كلام الطيبيني
الردي لو بان مايذكر عماله
مايعد اللاش مقصور اليميني
أركبه لعيون من زينٍ دلاله
ماتحاكوا في قفاه الرامسيني
مابغى غيري وانا مابغى بداله
قاعدٍ لي بالرجا مدة سنيني
الولد وان طاب قالو من خواله
بالخوال يسال قبل الوالديني
أشرب الفنجال واكب البيالة
تابعٍ سلمي سلوم الأوليني
ولاقعدنا بالعمل بنا الرزالة
ناخذ العليا طريق الفايزيني
قال خر الذيب من هاجوس باله
كلمة يلعب بها والبال زيني
قالها يومه طراله ماطراله
من هواجيسٍ تشيب المرضعيني
غرني بعض الرجال بكثر ماله
مادرى ان الموت في حبل الوتيني
كيف ينفعني وابا(..........) خاله
مايقوم البيت دام الساس طيني
ناس وين اللي عوايده الجمالة
مثل ابن ظافر حمد ليته يجيني
الثنا والجود دايم في خياله
علمه ظافر سلوم الطيبيني
جوّد العليا ولزمّها عياله
وادركوا من علمته دنيا وديني
واهني من باع حظه واشترى له
وسار في درب النبي وأخزى ال****ي
موقفه ماكل رجال يناله
من بغى ممشاه يقعد مرتيني
كم ذبح من حايل من حر ماله
وعادته لطمة خشوم العايليني
وللجميع تحياتي

[ابن الصحراء]

مشكور ابو خالد اللي يلحق التالي
بعد تعرقل مسار اسباب توصيله
يوم الزمن بدل الاحوال باحوالي
غيرلوضعن تزعلنا تفاصيله
الى شفت منزال بعض اصحابنا خالي
اصمت لاقالت هجوسي من تغنيله
اول اذا قلت كلاً دق موالي
واليوم قولك هبا ماحدا يراعيله