من اشعار فهد عافت

[صبر]

الليل

الليل موحش غريب وحيّة رقطا وديجور
والليل طيب ودفا واخت تمازحني ونوّار

ساعات احس ان هذا الليل : نبش عظام وقبور
وساعات احسّه : فرح بنت برسالة حب واسرار

كم ليلة كان فيها الليل : عبد رطب محفور
وكم ليلة كان فيها الليل : ((جيفارا )) وثوار

يا ما تكدس وهو يشتم (( عيال الكل )) مخمور
وياما (( تسندس )) وفاح اللون الأخضر وأربك الدار

له ألف مليون صيغه في يديه النار والنور
وهو شيئ ثالث بعيد عن انفلات النور والنار

يا ليلة ليلها زرنيخ منفي يابس بور
لي ليلة كان حضن أم وثلاثة أيتام وصغار

ليل اتشمشم به اللي مر نكهة خبز تنّور
وليل اتجشم به اهوالي لحالي واصبح كثار

انا اصدق الناس واعدلهم وانا البهتان والزور
يا قطعة النّرد شوفي وش بقى لي بي من اعذار

في داخلي قصة غياب غريب يشعل حضور
هذا اليباس بعروقي يلعن ام الوقت لا جار

غاب الطفل ، قلت طيّب غاب بعد الطفل عصفور
طيّب وغاب الثمر طيّب وغابت كل الأشجار

غابوا محبين طيّب غبت أنا طيّب بكت دور
طيّب وبعدين يا طيّب ؟ وش اللي ظل ما صار ؟

تبسمت لي مرة قالت تعال وطاش بلّلور
بالحكمة اللي تضاحكنا عليها دمع وغبار

ما دام دنيا وترفعها قرون السيّد الثور
وش يزعل العاقل ان نادى عليه حمار : يا حمار ؟

[صبر]

غمازتين وسنا


احيان احس ان انا غمازتين وسنا
لبنية سيلتها حشمة زايده

واحيان احس ان انا موسم حصاد وجنا
في قرية نايده في بلدة نايده

واحيان احس النفل بعضي يمر الغنا
راعي غنم يحطب من ضلوعي البايده

واحيان احس ان انا ويا الهبوب تننا
للغصن نلبس ثياب الصبح ونعايده

واحيان واحيان احس ان الضبا بي هنا
واليا تحركت اخاف اذير القايده

واحيان اوقف عدوي واسأله اينا
بنا انا وايني بك جمرة قاديه

في صوت فيروز انا الصفصاف والميجنا
وانا مع حجاب شرق وطايره عايده

كلي من احيان من أشيا بسيطه بنا
تمر في صمت واستسلام ومحايده

أحرث من الداخل اقصاها هدام وبنا
لغاية الارض ماتصبح بنا مايده

وانا اكتب الشعر لي أو لي ولك أو لنا
كذا بلا ايدلوجيات ومزايده

الشاعر اللي من الخارج عذاب وضنا
في داخله همت المتمنعه رايده

الشاعر اللي مثل شمع نحيل فنا
حقيقته شمس تستلقي على المايده

اياك ترثين لي أو تحسبين ان انا
غالطت نفسي بلا داعي ولافايده

ماهو صحيح ان انا اباعدت عما دنا
فقط لأني أحب الوعر والكايده

[صبر]

هيّنه !!


هينه دام هي هذي فهي هينه
والله اني حسبت العاقبه عاقبه

عاد تدري هي من أول وهي بينه
شوفها مايبي له نظرة ثاقبه

بنت ستين كلب وزفت ومطينه
قصة النجم والخبل الذي راقبه

مابعد شفت من همي سوى عينه
كيف أجل لو همومي جتك متعاقبه

جيتك بغصن طيب زهرته لينه
كيف لو ييبس وتصفر الأوراق به

من رجا خير في شرواك ماعينه
لاأنت سباق طيب ولاأنت لحاق به

مومس الوقت لو صلت ماهي دينه
يعرف البير واللي فيه ومن واق به

لا تحلف اليمين ولا نبي بينه
فارق الصدر يالسر الذي ضاق به

كل شخص له من الذل مافينه
وكل شخص له من العز مالاق به

زيّن اللي تبي واللي تبي شيّنه
ماانت حول الطنايا لحيتك عاقبه

[صبر]

اخيذة ضحى



هذا القلم وش كتب هذا الندم وش محى
في ايدي رعشه ولاظني على شي قاوي

حبيبتي قربي هاتي يدينك صحى
في داخلي طفل مري به حمام وغناوي

الحب حنطه هقيت ان المفارق رحى
فارقت زاد الغلا رديت ولا بلاوي

أثر الهوى لاتمكن منك اخيذة ضحى
اثر الغلا الصدق صدق ان ضج ماعاد ياوي

ونا اخر اللي يدور صادقين نصحا
في الحب ياشينها تنوي تقل مانت ناوي

لاهي صعيبه ولاني لاقي اللي وحى
ولاهي قريبه ولاهي اللي تجي بالهقاوي

ولاهي بحب الخشوم ولابدقم اللحى
ولالقينا لها عند المطوع فتاوي

ماعاد ينفع خجل فيها ولامستحى
برد يفطر خشوم البل وعاشق خلاوي

[صبر]

أخافك تواعدني !!


اخافك تواعدني ولا توفي الميعاد
واخافك تواعدني وتوفي مواعيك

لانك اذا اخلفت مات الهوي ببعاد
ولانك اذا اوفيت مات الهوي بايدك

وانا ابغاك لايامي فراش وغطا ووساد
اذا الليل بعيوني نهاري علي جيدك

وانا ابغاك مينا لاغترابي وابيك الزاد
لجوعي وابي حريتي تدخل في قيدك

وابيك الشبك والطعم والصيد والصياد
وانا ابيك تطلبني وانا اعطيك وازيدك

أخافك نعم والخوف في داخلي يزداد
لانك تسيدت الزمن والزمن سيدك

[صبر]

مدى


أهز جذع المسافة ويتساقط مدى
أهز جذع القصيدة ويتساقط نخيل

تزهر يديني أحس انه طريقي بدا
واقول حيا على هذا الفلاح الجميل

أبدا بتجهيز اوراقي ، وقطرة ندى
أشوفها من على خد النوافذ تسيل

آخذ معي كل مايخطر في بالك عدا
ثوب ٍ تركته معلق في جدار ٍ هزيل

تبكي الستاير تناديني أرد الندا:
عمر الشقي ياستاير - لاتخافي - طويل

أودع البيت ، ياجدران طين وصدى
من كان مثلي رحيله أرض وارضه رحيل ؟

أسير حافي قدم دربي ضلال وهدى
وجهي سحاب وظما صوتي نواح وعويل

أقطع مشاوير تقطعني بطيب وردى
واصير انا الهين الميسور والمستحيل

وليا لقيت الطريق اللي مشيته غدى
قصير مثل الفرح مثل الليالي بخيل

أهز جذع المسافة ويتساقط مدى
أهز جذع القصيدة ويتساقط نخيل

[صبر]

جمعتك والحطب



جمعتك والحطب بيني وبين الذاكره فواح
وشبيت الكلام بدفتري واحرقت خلاني

شكت عيني من اثار الدخان وجفن عيني صاح
وشديت الجفون لبعضها لاشك مامداني

بكيت ويوم شفت اني لحالي ماكتمت نواح
وسيلت الاحبه كلهم واحد ورا الثاني

من اول مانت خابر لاخر اللي مانت خابر طاح
ولاخليت احد منك انت لين العاذل الشاني

اذا الجرح انخلق لانسان أنا انسان انخلق لاجراح
واذا الاحزان لابن ادم انا ابن ادم لاحزاني

عزيز القوم ذل بلعبة الغفران والتفاح
ولاني سائل رب العباد يجيك ماجاني

ولاني طالب الا اني الا مني بكيت ارتاح
ولاني طالب الا ان انت ماتشمت بوجداني

لقيتك تلتفت لي في الدموع وغامرتك افراح
ومت من القهر حتى بهذي وتحداني

[صبر]

يابحر الاحباب





يابحر الاحباب جزرك شين
حي المنازل تحية مد

ما به على القلب كثر اللين
قاسي متى ما الحنين اشتد

يدفيني الضم في التنوين
يا شهوة الضمتين بود

حرفي حطبته من التخمين
واشعلتني له ف ليلة برد

والشعر جوله اثنين اثنين
قبلي وبعدي وجيته فرد

من قبل اجي له وانا : البعدين
ومن بعد ما جيت جيت البعد

لااقرب من ( الحمد ) كثر آمين
لاابعد من ( آمين ) كثر الحمد

[صبر]

دموع القصيده



صدر الورق يحضن دموع القصيدة
لما دموعي صدركم ما حضنها

وحبري عزاي بكل وردة شهيدة
لبستها ليلة فرحها كفنها

كان الفرح في بسمتك يوم عيده
تامر على فرحة زماني وتنها

كانت عيونك في حياتي عقيده
دافعت بأشواق المحبين عنها

كنت أختصر كل الدروب البعيدة
بأوتار تعزف للأماني لحنها

وفجأة لقيت أن الليالي عنيده
ووقتي عطاني حسبة ما وزنها

وأثر السحابة للعطاشا مكيدة
تغدر بمنهو راجي الخير منها

يا قاتل حلم المحبين بيده
ضيعت ساعات الفرح من زمنها

بين الهقاوي والعلوم الاكيده
ضاعت دروب اللي في عيونك زبنها

واللي بقى مني خطاوي شريده
ودموع عيا صدركم ما حضنها

[صبر]

الدليل




أضحكتني كلمتك : وين الدليل
عن هواي اللي تقول وتدعي

الدليل : الهم والجسم النحيل
وارتعاش الصوت لا صرتي معي

الدليل : الدمع من عيني يسيل
يوم هزيت بوداعك مسمعي

الدليل: الجرح والصمت الطويل
بانتظار انك عليا ترجعي

الدليل أني ركبت المستحيل
لجل أغير في عيونك موقعي

يوم كل عاش في فيّ ظليل
كنت أسافر وآخذ أحزاني معي

واعبر الدنيا كما عابر سبيل
شايل جرح الهوى في أضلعي

أدري أن الوقت لو يعطي بخيل
بس أحاول يمكن أنسى موجعي

كل هذا وتسألي: وين الدليل
عن هواي اللي تقول وتدعي

أعتذر كلي أسف ما كو دليل
أقنعي بالحب أو لا تقنعي

[صبر]

اعتراف




اعترف لك بانتصاراتك علي
واعترف اني خسرت المعركة

في ضياعك ضاع مني كل شي
ياسرابٍ عاجز لا امسكه

تهت أنا ما بين ميت وبين حي
مع فؤاد ذنبه إنك تملكه

بالمثل اخر علاج الناس كي
وأنت حددت الطريق ومسلكه

احرقي يانار ما خطت يدي
انتهت قصة عذاب مضحكة

انتهت قصة فراشٍ شاف ضي
اقترب من شان نوره واهلكه

[صبر]

الأبواب

بغيت أرمي بعض حملي

عجزت ألقى صديق

إلا الرصيف وبارد الإسفلت

ركلت اللي صدف رجلي

من احجار الطريق

وقلت :

ابي اقرا في الحصى

سر ارتباكي

لا لمست

الضاحك / الباكي انا

***

حملني

قبل لا اعرف الكتابه

موجك الازرق على متنه

وقال ان البلل : فتنه

وقالت لي :

قبل حتى ال(( قبل )) قاعك:

تضيع ان كثروا اتباعك

تغرد بالاغاني

بالاغاني البيض ياشاعر:

نجوم الليل : تفاح المسا

وعيونك : ذراعك

***

الملم حنطة غباري

البّس لهجتي ما يستر العاري

وأفك الباب : بلا د ي

والجهات الاربعة في غيبتك : ظلما

وما بين الجهات الاربعة : ظلما

ابي اتجهك معي : وجهك

واول ما حفظت من ((الرمل)) و((الما ))

واذا ما شابه المعنى عيوني

عاذرك : خوني

ولكن آه لو تدرين

عن طعم الثواني في غيابك

عن لهاث الضو في الشارع

عن الفارع من الحزن الطري

عن دفتري / عن جلسة المقهى

بلا اصحاب

***

تهجيتك ت ه ج ي ت ك

رفضت الممكن / الباهت : طريق

وهذا انا : جيتك وناجيتك :

اذا ما اشتقت في الغربة

قل الذكرى طحين الوقت

واخبز من تبي قربه

ب لا د ي

يا مفاتيح الكلام البكر :

جوعي لك / رجوعي لك

مثل ما للنجوم : اسرارها

مثل ما للهدوم : ازرارها

مثل ما للهموم : اوزارها

للمفردات الخارجه عن سلمها,

والداخلة في حلمها زوارها

قومي هو العشق

احتمالات التطاول في البنا

منح البنفسج فرصة الركض

انعتاق اجسادنا / المفرق هو العاشق :

جنونٍ يحفر فكبد السما

من شان دفن الارض في الازرق

ويا ازرق :

يابعد وقرب

يا لمحة في العيون الغرب

يا سقف الكون يا لون اللون

يا حبر اقلامنا المعجون

بالفوضى , وطين العاقل المجنون

يا ازرق :

من اللي يعرف ان البحر :

هين ؟

قال (( من يغرق ))

***

اشوفك ملح واتهجّا

حروفك وادخل فملجا

كفوفك واغرقك وانجا

واحبك واشبه الجامح

***

احبك : واشبه الجامح

لذا كان الصهيل : وسادة المعنى

وكنتي : أوّل الاشكال

مرَه فيها من التفاح

ما يحني غصون القلب للموّال

وكنتي : اخر الاشكال

مرَه لكن : فرس ودلال

وانا بين السما والقاع

كنت اركض وامد من العيون :

ذراع

أزاوج بين نجم الليل والنعناع

واهدي خطوتك خلخال

أنا الشاعر بلادي أو أنا الأشياء

ما تخفى وما تنقال

أحبك واشبه الاطفال

تحب وتشبه الاطفال

وتغريد الكتابه

(( بالرذاذ الطيب الدافي )) :

بهذا ثرْثرت نسمه وهفْهفْ شال

***

أحبك واشبه الجامح

لذا كان الصهيل : وسادتي

كانت عيونك : عادتي

والمثقلات من الغصون قلادتي

كانت

اذا ماشابه المعنى : عيوني

عاذرك خوني

ولكن لا تظنين القصايد بالوفا

خانت

بلا د ي , آه لو تدرين :

عن طعم الثواني في غيابك

عن لهاث الضو في الشارع

عن الفارع

من الحزن الطري / عن دفتري /

عن جلسة المقهى بلا اصحاب

عن الأشيا يقيدها ويطلقها (( الغريب ))

وبعدها يسال عن الأسباب

عن عيوني تصير (( الرّمْث ))

ويصير السهر (( حطّاب ))

عرفتي ليه انا المخطي وانا المعطي

وانا المطلوب والطلاب

عرفتي ليه انا كل الحضور

فحفلة عيونك وانا الغيّاب

عرفتي ليه انا الصادق

إلى حد الذي سميت به : كذاب

عرفتي ليه :

انا اكره دفتري واغليه ؟

ليه اموته واحييه ؟

ليه اثبته وانفيه ؟

ليه اهدده واحميه ؟

ليه اعطيه واستجديه ؟

ليه اجلس في كلي خارجه

واجلس في كلي فيه ؟

ليه ابدا الحزن وانهيه

باسمك

او عرفتي ليه

انا ارمي لهجتي : للملح والفتنه

وارد الباب

***

وحدك تفتحين الباب

وحدك

تطلعين النورس الغافي على صدري :

سمك واعشاب

***

ارتب لهجتي يا أجمل ضيوفي

واهيّل قهوتي وتهيلين عتاب

تصبين (( الدرايش )) في عيوني

و(( الرسايل )) و((الجدايل ))

و(( القبايل )) و (( القوايل ))

والكلام الحلو والاحباب

واضمك

سالفة (( غوص )) قديم فبحة

الشيّاب

أضمّك شيطنة طفل

ان ضحك : يجمع من غيومك أرانب

وان بكى : ت ت ك س ر

الألعاب

أضمّك

حبْل في (( حوش العشيش ))

و (( ضرتين )) وهفهفات ثياب

أضمّك: في الأغاني - لا ارتفع

صوت الاغاني

و (( الهوى غلاب ))

أضمّك داخلي يا داخلي

شنطة كتب فصل

وطباشير وشغب طلاب

أضمّك صالةٍ ضجّت بجمهورٍ غريبٍ

وشاعرٍ مرتاب

وتروحين ويظل العطر

تروحين ويخون السطر

لا (( الجهراء )) تجمّع رملها في

راحة يديني

ولا هذا هو (( المرقاب ))

,,,,

نعيق غراب نعيق غراب

نعيق

أ غراب

***

امد يديني ليديني

بلادي واسالك ويني ؟

واصيح : اهواااك

يكشر بينك وبيني :

((خميسٍ )) من جثث واسلاك

ورق ينشر ورق يطوي

شفاه من الظما تروى

جسد يركض بلا جدوى

ذراعٍ طيبه تلوى

بنادق ترتفع مابين :

طفلين وصحن حلوى

أغاني والرصاص أقوى

((بلادك وين يا نجوى؟ ))

بلادك وين؟

يا نجوى بلادي وين ؟

نغني والرصاص أقوى

من الاثنين

لو تدرين لو تدرين لو تدرين

عن طعم الثواني عن لظى الفرقا ؟

وكيف ليا غزاني في خميسك

صرختي ترقى؟

ابعْثر لهجتي في كل صبح

وكل صبح القى :

حروفي جامدة

قهوة كلامي باردة

نار الأغاني خامدة واشقى

***

من اوّل يوم لفراقك إلى هاليوم

ووحدك تفتحين الباب

وحدك تطعمين النورس الغافي

على صدري

عتاب ولوم

من اول يوم لفراقك الى هاليوم

ووحدك تذبحين النوم

هذاك اللي دماه تلطخ عيوني

سهر ونجوم

من اول يوم لفراقك الى هاليوم

وانا اركض واتبع آثارك

وامد من العيون ذراع

واقطف من سماك :

هموم

من اول يوم لفراقك الى هاليوم

وانا فوق الورق

تحت الورق

بين الورق مهزوم

***

كتبت وما بخلت بجرح

،،،،

كتبت وما تنفس صبح

عرق واشباح/ ارق واشباح

ورق واشباح / كفى ياديرتي

برتاح

من اول يوم لفراقك

ولا خان الظلام ولا وفا مصباح

من اول يوم لفراقك

وانا اضمّد جراحك يا بلد بجراح

من اول يوم لفراقك

وحمل المفردات (( سفاح ))

كفى برتاح

كفى ياديرتي/ ياسيرتي/ ياحيرتي

يا غيرتي برتاح

خلاص ما عاد امدّ من العيون ذراع

واقطف نجمة التفاح

هي الفرقا :

وما فينا الذي من فارقك ما

يرفضه رفضه

وما فينا الذي ما يلفظه لا من

حكى لفظه

وما فينا الذي ما ينهدم صبح ومسا

بعضه على بعضه

غبار ارواحنا يزداد ما نقدر على

نفضه

تبرينا من الاشياء

تبرت مننا الاشياء

تغيرنا كثير وكل قلب خان به

نبضه

هو الإنسان من اقصى حدود الدمع

الى اقصى حدود الدمع لعبة في يد

اللحظه

وضاع الشعر كل الشعر

في معنى : عجوز/ ومفردة

نبضه

والشاعر

يغازل بالرذاذ الطيّب الدافي صباحه

والمسا: يصفع جبين الشعر بالكبريت

والفضة

***

أبي أصرخ في البحر : تكفى

يباس فشفتي وسكوت

ولا ادري كيف تبتشفى

جروحي والجروح بيوت

دخيل عيونك الاوفا

ترفق بالتعب يا (( كوت ))

في برد يشفه المنفى

في ليل يشبه التابوت

قليل من الحطب وادفا

قليل من التعب واموت

اردّ الباب

دخيلك يا بلد لا تفتحين الباب

***

أبي أرمي من عيوني الناس

والإحساس

والأجراس

والحراس

والكناس

والوسواس

والخناس

الفظ آخر الانفاس

ارمي جثتي فوق السرير/ الياس :

لا شاعر

ولا معنى

ولا قرطاس

نعاس نعاس

نعاس

نعاس

نعاس

ن ع ا س

ن ح ا س

ن

ع

ا

س

***

من اللي هناك ؟

من اللي هناك ؟

من اللي يرمي الشباك

با حجار الحنين ويوقظ الفطنة ؟

انا القاع اللي قالت لك :

تضيع ان كثروا اتباعك

وانا البحر اللي شالك فوق متنه

بلادي

يا كثر ما ني مقصّر بالغلا وادري

ولكن ما قويت الجرح

تمنيتك تهجيتك

وشبّيت المعاني منْ حطب صدري

كتبت وما تنفس صبح

من اول يوم لفراقك

وانا اركض واتبع آثارك

واركض واتبع آثارك

واركض واتبع آثارك

ولكنك وقفت

ادري

لأنّ الصمت عاجز يقتلك

والشعر عاجز ياخذ بثارك

***

أبي حرّيتي

هذا الحكي من غابت عيونك:

شبك وسياج غضب كرباج

خذ عيون الهوى معراج

تشبه دايما بالجامح الطفل

وتذكر حكمة الامواج

ولا تهتم قصر ليل او طول

وكون المستحيل المعطي الذاخر

تقدم دايماً من أوّل الأوّل

وخذ حلمك معاك لآخر الآخر

تعلم كيف تقطف من بساتين الكلام

ال(لاء) وتصرخ ( لا )

أحبك

كثر ما احبك

أحبك واكره الاملاء

هو العشق احتمالات التطاول في البنا

قبل الالف

منح البنفسج فرصته للركض

بعد الياء

خذيني

علميني من جديد استلهمك

واستل همك

علميني كيف اغامر في البياض

من الورق

واعطي لصدرك فتنة الغامض

من النابض من الاشياء

خذيني

علميني كيف اسوي من عصافير الطفولة :

قاعدة والمدفع استثناء

جراح الطيبين : القاعدة والمدفع استثناء

عيون الطيبات : القاعدة والمدفع استثناء

***

زمنا وان قسا بيلين

وطنا وان قصا داني

تعوّدنا نزف الطين

عروس وصدرها حاني

ووندخل فـ الكلام اثنين

وننسى أيّنا الثاني !

[صبر]

نقد


ساحة الحقد واللا نقد والثرثره
ساحة الفقد والعقد الرخيص الهزيل

ساحة النعي واللاوعي والمسخره
ساحة السعي بالدرب الخفيض الذليل

ساحة الكذب واللاعذب والمنكره
من فعايل ولامن عايل الليل ليل

ساحة البيع والتشنيع والسمسره
ساحة الراحه اللي بين بنك وعميل

نقدهم قولة الميسر على الميسره
نقدهم قولة انت الزنج يالزنجبيل

يلمزون الشمال ب ياقمر مشغره
ويلمزون الجنوب ب زيدي الشاي هيل

ساحة نصفها واكثر يبي فلتره
لا لطافة خليل ولانظافة شليل

[صبر]

المرجوج

في ذكرى من لا يحتفل بذكراه

" جرّة أولى " :

" ياما رميت الكيس "

عن ظهري المحني

من خوف يلمحني

قبل آصلك إنسان

" يا صخيف الذرعان "

" جرّة ثانية " :

مغروس انا في القاع

مالبّس ال لا ، "إيه

" يقطعك يابياع

دمه وشاريه "

" حالة " :

مهدور دمي

يابنت عمي

بس الفحم مو مكحلة

ولا الليالي الممحلة :

ربيع

اقولها على شفا حفرة

من النفط

واضيع

{ عزيزتي وداد

البارحة كنت اغسل العشب انسرق وجهي ، نبت , و

الخضار : غبار له منقار نار، وله جناح : جدار وعيون ٍ جراد

البارحة هاجر مشت أشواطها المليون في روحي بأقدام ٍمن التاريخ

والاطفال والفوضى نبت زمزم من البترول يشربنا سواد

البارحة جيت اسرق السمع ل صهيل الخيل من باكر يجي ،

قلت التجي ،

غمضت داستني الجياد }

جرة ثالثة :

أيامنا علبة

احلامنا أعواد

معقودة مفقودة

" بوقت ٍ ركض كلبه "

ينهش لحمنا زاد

" ونامت به فهوده "

جرة رابعة :

السالفة

قد قلتها في شفة ٍ متراجفة

" سم السبب ياعارفه "

" سم السبب ياعارفه "

" حالة " :

لجل السنين المقبلة

لجل الوجيه الكالحة تصبح جواب الاسئلة

كل الذي نحتاج له : -

كبريت

سجادة صلاة وتمر

لجل انفجار السنبلة :-

خبز وثياب صغار

لجل الزلزلة

كل الذي نحتاج له : -

كبريت

سجادة صلاة وتمر

لجل اختصارالمرحلة

لجل الفحم من غير خوف ، نقول

ماهو مكحلة

كل الذي نحتاج له : -

كبريت : سجادة صلاة

وتمر

جاني ملاك الريح

والقيد في يدينه

لكن يدي عفت

اعطيته المفتاح

اطلق جناحينه

ريح ٍ بها لفت

ومن عهد ذاك اليوم

بيني وبين الريح

صداقة ٍ : -

لا جيت آبطيح

خفت

جرة خامسة :

وحيد

وحيد

وحيد

ازرع سنابل وانتظر ، تنبت رماح

وحيد

وحيد

وحيد

اكتب على نجم ٍ بعيد :

" احد ٍ يحاول ستر "

مابه من جراح

" واحد ٍ يحاول بالردى "

ستر القصيد

جرة سادسة :

" متىيجي في الارض بعض التدابير

حتى يجي للصابرين انفراجي "

طفل وفَراش ودمعتين وعصافير

أموت ، واترك في حديهم سراجي

" ثلاث ورقات وجدت فيما بعد " :

" 1 "

السفينة :

ناقة البحر الحزينة

والمواني : غلاف

والفانوس : قاموس القصيدة ،

والقصيدة : شاعر ٍ مطفي

ويكفي

دثريني

- أول الكذب الحقيقة -

لهجتي بوابة الثلج ،

وعناويني : غبار

مانام احد بفراشي البارح ، ولا لي

صاحب ٍ في الغار

" 2 "

في الظلما

من يشرب البرق

ويعرف الفرق بين النار والما

إما نبي ، أو شاعر ٍ صعلوك

أو أسمى

" 3 "

عزيزتي وداد

الوكاد :

إن الغيوم بتنقشع

وان الشموس اللي زرعنا في رماد

الجرح ، في وقت اللقا المسروق ،

في تلويحة التوديع ، في الممنوع

من كتب ٍ قريناها ، وفي موت

الصغار من العطش

لازم تشع

يمكن على هيئة قصيد

أونار

أو ضحكة صغار

ويمكن على شكل ٍ جديد :

طفل بيده حديدة ٍ يذبح بها

رجل ٍ جشع

بس الوكاد

ان الغيوم بتنقشع

وان الربيع

مقبل على الجميع ،

مقبل على الجميع

استبشري

[صبر]

لو ديرتى خيمه

لو ديرتى خيمه

أبنى لها ديمه

لو ديرتى :عذرا

اكتب لها وأقرا

من دفتر الشيمة !!