امل حياتي ..
أغنية (أمل حياتي) أحمد شفيق كامل ـ محمد عبد الوهاب
أمل حياتي يا حب غالي ما ينتهيش
يا أحلى غنوة سمعها قلبي ولا تتنسيش
خد عمري كله بس النهاردة خليني اعيش
خليني جنبك خليني.. في حضن قلبك خليني
وسيبني أحلم سيبني.. ياريت زماني ما يصحنيش
***
أملي، حياتي، عينيا.. يا أغلى مني عليا
يا حبيب امبارح وحبيب دلوقتي
يا حبيبي لبكره ولأخر وقتي
احكي لي .. قوللي
أيه من الأماني ناقصني تاني وانا بين ايديك
عمري ما دقت حنان في حياتي زي حنانك
ولا حبيت يا حبيبي حياتي إلا عشانك
وقابلت آمالي، وقابلت الدنيا، وقابلت الحب
أول ما قابلتك واديتك قلبي يا حياة القلب
أكثر م الفرح ده ما احلمش
أكثر م اللي انا فيه ما اطلبش
بعد هنايا معاك يا حبيبي
لو راح عمري أنا ماندمش
وكفاية أصحى على شفايفك بتقوللي عيش
أسمعها غنوة تقول لحبي ما ينتهيش
خليني جنبك خليني.. في حضن قلبك خليني
وسيبني أحلم سيبني.. ياريت زماني ما يصحنيش
***
يا للي حبك خلي كل الدنيا حب
يا للي قربك صحى عمر وصحى قلب
وانت معايا يصعب عليا رمشة عينيا لو حتى ثانية
يصعب عليا لا يغيب جمالك ويغيب دلالك ولو شوية
قد كده بشتاق إليك.. قد كده ملهوف عليك
نفسي أنده لك بكلمة ما تقالتش لحد تاني
كلمه قد هواك ده كله قد أشواقي وحناني
كلمة زيك واللي زيك فين؟
ده انت زيك ما اتخلقش اتنين
وكفاية أصحى على شفايفك بتقولي عيش
أسمعها غنوة تقول لحبي ما ينتهيش
خليني جنبك خليني.. في حضن قلبك خليني
وسيبني أحلم سيبني.. ياريت زماني ما يصحنيش
***
يا حبيبي مهما طال عمري معاك برضه أيامه قليلة
دي السعادة والحنان اللي في هواك ما يقضيهاش أجيال طويلة
حبك يا حبيبي ملى قلبي وفكري
بينور ليلي ويطول عمري
بيزيد.. بيزيد في غلاوته.. دايما بيزيد
وتملي جديد في حلاوته وتملي جديد
انت خليتني أعيش الحب وياك ألف حب
كل نظرة إليك بحبك من جديد، وأفضل احبك
أنا حبيت في عينيك الدنيا كل الدنيا
حتى عوازلي أو حسادي
كل الناس حلوين في عينيا حلوين
طول ما عينيا شايفه الدنيا وانت قصادي
وأنام وأصحى على شفايفك بتقولي عيش
أسمعها غنوة تقول لحبي ما ينتهيش
خليني جنبك خليني.. في حضن قلبك خليني
وسيبني أحلم سيبني.. ياريت زماني ما يصحنيش
****
رد: امل حياتي ..
المشاركة الأصلية كتبت بواسطة ليالي
مواقع النشر (المفضلة)