قـالـوا عـلامـك غــادي الـيـوم شيـبـه
تـوك شبـاب ومالـيـاً راســك الشـيـب
ان كــان شيـبـك فـاقـداً لــك حبـيـبـه
يـامــا فـقـدنــا والـلـيـالـي تـجـاريــب
قـلـت الـهـوى كبـيـت خبـثـه وطيـبـه
لــو الـهـوى مـاهـو حــرام ٍ ولا عـيـب
شيبـي فـراق اهـل العـلـوم العجيـبـه
اهـل النخـاوي عنـد عـوج العراقـيـب
غـابــوا وغيـبـتـهـم عـلـيــه مـصـيـبـه
وفارقـتـهـم مـافـيـه شـــك ولاريـــب
الـمــوت خـصـمـا ماالـقـيـنـا طـبـيـبـه
عـلــة نـحــر ماتـنـعـرض لـلأطـابـيـب
والفـقـر غلقـهـا عـســى الله حسـيـبـه
واللي ما شاب بوقتنا اليوم مايشيب
ان كــان تقـديـر الـرجـل غـيـر جيـبـه
مـن ويـن لـك تقديـر يافـارغ الجيـب
حيـا ً يجيـب الـه المكـاسـب نصيـبـه
وحـيـا نصـيـبـه لايـــودي ولايـجـيـب
وتخـلـي الأصـحـاب مـاهــي غـريـبـه
لـكـن الغريـبـه لاكـرهــوك المـعـازيـب
والـــرزق غـيــر الله مـااحــد يجـيـبـه
الـلـي يجيـبـه عـالـم الـسـر والـغـيـب